shumilina.by

Інфармацыйны партал

Сацыяльныя сеткі:

Навіны Шуміліна Грамадства

04.03.2020 17:34

282 прагляда

0 каментароў

«Страх ёсьць у мяне». Вядомую беларускую журналістку правяраюць на каранавірус у карантыне

Мянчанка Дарʼя Ламаноўская з «Камсамольскай праўды» была на поўначы Італіі яшчэ да паведамленьняў пра ўспышку каранавірусу там.

Дарʼя, Ламаноўская

«Выклікала „хуткую“, мяне адразу завезьлі ў інфэкцыйны шпіталь на Крапоткіна, — расказвае Дарʼя. — Тут у 4-м корпусе знаходзяцца хворыя на каранавірус, у мяне іншы корпус, трэці, здаецца. У суседняй палаце тут тыя, хто кантактаваў з захварэлым. Хто дакладна, ня ведаю. Мне пра гэта санітарка расказала».

Да лекараў Дарʼя зьвярнулася пасьля таго, як зьезьдзіла ў Італію на кароткі адпачынак. Спачатку Дарʼя з мужам былі ў Балёньні, пасьля паехалі ў Вэнэцыю, вярталіся з Трэвіза. Прыехала ў Менск 16 лютага, тады яшчэ не было інфармацыі пра ўспышку каранавірусу на поўначы Італіі. Да 27 лютага ў Дарʼі не было клопатаў са здароўем, аднак у перадапошні дзень зімы раптам забалела горла і паднялася тэмпэратура.

«Горла балела моцна, вырашыла пазваніць у паліклініку, — працягвае Дарʼя. — Мне кажуць — прыходзьце ў суботу. Я прыйшла з мужам. Як толькі там пачулі, што мы былі ў Італіі і хочам праверыцца на каранавірус, нам адразу выдалі маскі, да доктара без чаргі адвялі. Яна нас у масцы сустрэла, распытвала, дзе мы былі, што і як. Паглядзела горла і сказала, што ў нас ангіна. Адпусьціла дадому. Сказала, што тэсту на каранавірус ня трэба рабіць».

Здымак з той самай паездкі па Італіі

Але стан здароўя Дарʼі за выходныя не палепшыўся, ў панядзелак ранкам яна вырашыла зноў схадзіць у шпіталь, на гэты раз да отарыналярынголяга. Ён паставіў ужо іншы дыягназ — востры танзыляфарынгіт. І таксама адпусьціў дадому. Увечары 2 сакавіка, пасьля падвышэньня тэмпэратуры, справа дайшла да «хуткай».

«Прыехалі дзьве маладыя дзяўчыны, у спэцыяльных акулярах, у масках з кляпанамі, — расказвае Дарʼя. — У халатах былі таксама. Тэмпэратуру памералі, агледзелі горла, спыталі нават пра нумар рэйсу, якім мы прыляцелі з Італіі. Сазвоньваліся зь некім і забралі мяне ў інфэкцыйны шпіталь. Сказалі, што акурат хутка 14 дзён, як я прыехала з Італіі, усё супадае».

У інфэкцыйным шпіталі Дарʼю яшчэ раз агледзелі, узялі аналізы, распыталі пра маршрут падарожжа і накіравалі ў палату. Там ужо была адна дзяўчына.

«Адчыняю дзьверы, а там дзяўчына ўжо ляжыць, — расказвае Дарʼя. — Я кажу ім: мы ж будзем кантактаваць. А раптам я заразная альбо яна заразная. Мы ж невядомыя адна адной. Раптам у некага з нас каранавірус. Я пабачыла пагрозу, папрасіла мяне ў асобную палату зьмясьціць. Мэдсястра пагадзілася, я ёй вельмі ўдзячная за гэта. Пакуль я адна тут, доктар сказаў, што прынамсі ў аўторак нікога не падселяць. Што будзе далей, невядома».

ГЛЯДЗІЦЕ ТАКСАМА:

Галоўны інфэкцыяніст краіны: «Існуе 37 відаў каранавірусу»

Дарʼі пакуль не сказалі, калі будуць гатовыя вынікі аналізаў на каранавірус. Заўтра ў яе дзень нараджэньня, сустракаць яго, хутчэй за ўсё, давядзецца ў інфэкцыйным шпіталі.

«Баюся, што да мяне некага падселяць, — кажа Дарʼя. — Я ўжо пыталася пра платную палату, але тут няма такіх. Мэдыкі вельмі стараюцца, я ўдзячная ім. Распытваюць мяне пра стан, тэмпэратуру правяраюць. Тут такая атмасфэра своеасаблівая. Усе ў спэцыяльных акулярах. І мэдыкі, і санітарка нават. Яна тут прыбірала сёньня. Добрае да мяне стаўленьне. Санітарка паўжартам сказала, каб я не выходзіла на калідор, а то магу там каранавірус падхапіць. З майго акна відаць намёты, якія МНС паставіла. Страх ёсьць у мяне. Баюся нечым заразіцца, шчыра кажучы. Але і ў мэдычнага пэрсаналу таксама страх. Напрыклад, мне прыносяць ежу і стараюцца хутка сысьці. Але я магу гэта зразумець. Тэмпэратура, вярнулася з Італіі — ёсьць пытаньні».

«Я сутыкнулася з своеасаблівым цкаваньнем»

Дарʼя прызнаецца: амаль упэўненая, што зь ёй усё добра. Аднак не магла праверыць, ці так гэта насамрэч. Ужо ў інфэкцыйным шпіталі прасіла адпусьціць яе пад хатні карантын, аднак мэдыкі адмовілі. Муж журналісткі пакуль «на свабодзе», у яго няма такіх вострых сымптомаў.

«Я сутыкнулася з своеасаблівым цкаваньнем, — расказвае Дарʼя. — Нават калегі на працы зусім сурʼёзна казалі: Даша, не падыходзь да мяне. Маўляў, у мяне дзіця, ня трэба да мяне набліжацца. Адпраўлялі мяне праверыцца. Нехта дакараў тым, што я, вярнуўшыся з Італіі, не хадзіла на працу ў масцы. Але калі я вярнулася, пра эпідэмію ў Італіі не было нічога вядома. Толькі тут даведалася пра ўсё, не адразу, праз некалькі дзён. І сымптомаў ня мела. Я пачала дзейнічаць тады, калі праявіліся сымптомы. У майго знаёмага, які таксама вярнуўся з Італіі, на працы пэўныя калегі нават хадзілі да начальства, патрабавалі прыбраць з офісу ўсіх, хто быў нядаўна ў Італіі. Каб яны працавалі з дому. Гэта ўражвае ўсё, вядома. Дыскрымінацыя нейкая».

Цяпер Дарʼя чакае вынікаў аналізаў. Пʼе гарбату, піша артыкулы ў сваё выданьне, размаўляе з роднымі.

ГЛЯДЗІЦЕ ТАКСАМА:

«У камэнтарах пісалі, што мяне трэба ізаляваць». Дзяўчына з Уханю вярнулася ў Беларусь пасля карантыну ў Цюмені

Што трэба ведаць пра новы каранавірус з Кітаю

  • Невядомы вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease). Вірус спачатку меў назву 2019-nCov, цяпер афіцыйна завецца SARS-CoV-2.
  • Па стане на раніцу 3 сакавіка, ад новага вірусу па ўсім сьвеце памерлі ўжо 3119 чалавекі, афіцыйна пацьвердзілі 90,9 тысячы выпадкаў заражэньня вірусам (абсалютная большасьць выпадкаў хваробы і сьмерцяў ад яе фіксуюць у Кітаі). За распаўсюдам вірусу можна сачыць тут (дадзеныя абнаўляюцца штодзённа).
  • 27 лютага ў Беларусі зафіксавалі першы выпадак COVID-19 — вірус выявілі ў студэнта аднаго зь беларускіх ВНУ, грамадзяніна Ірану, які прыбыў з Баку 22 лютага. Па стане на 2 сакавіка каранавірус пацьвердзілі ў траіх чалавек. Ва ўсіх траіх стан здавальняючы, клінічных праяваў хваробы няма. На карантыне — 271 чалавек.
  • Сусьветная арганізацыя аховы здароўя рэкамэндуе трымацца далей ад людзей, якія чхаюць і кашляюць, і ня есьці дрэнна апрацаванае (недасмажанае або недаваранае) мяса. Паводле адной з вэрсій, вірус мог перадацца людзям пасьля ўжываньня якога-небудзь зь мясных або морапрадуктаў з рынку ва Ўхані.​
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Аляксандар Лукашэнка казаў, што беларусам наконт каранавірусу хвалявацца ня варта: «Мыйце рукі, менш абдымайцеся зь незнаёмымі людзьмі на вуліцы, усё астатняе — за Міністэрствам здароўя». Беларускія мэдыкі ж давалі больш дэталёвыя рэкамэндацыі.
  • У сувязі з распаўсюдам каранавірусу ў аэрапортах Беларусі, а таксама іншых краінаў узмацнілі захады бясьпекі: з дапамогай спэцыяльных рамак і іншых прыбораў вымяраюць тэмпэратуру людзей, якія ляцяць з Кітаю і іншых краінаў «групы рызыкі». Вядзецца санітарны кантроль на ўсіх памежных пунктах пропуску ў Беларусь.
  • Міністэрства аховы здароўя, а таксама міністэрства спорту і турызму параілі беларусам ня езьдзіць у Кітай.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя на многія іншыя рэсьпіратарныя захворваньні, неабходны дадатковы скрынінг.
ГЛЯДЗІЦЕ ТАКСАМА:

«Больш малітваў!» Праваслаўная царква і Касьцёл пра сытуацыю з каранавірусам

Алесь Пілецкі

https://www.svaboda.org/a/30466900.html

Апошнія навіны